home page

ఛాలీసా పఠనం చేయని నవనీత్

శాంతించిన శివసైనికులు

 | 
నవనీత్ కౌర్

నవనీత్ కౌర్-రవిరాణాలకు        'వై 'కేటగిరీ భద్రత

హనుమాన్ జయంతి రోజు మహారాష్ట్ర సీఎం ఉద్ధవ్ ఠాక్రే హనుమాన్ చాలీసా పఠించాల్సిందేనని, లేకపోతే తామే ఆయన నివాసం ఆ పనిచేస్తామని అమరావతి ఎంపీ , నటి నవనీత్ కౌర్ రాణా, ఆమె భర్త రవి రాణా (ఎమ్మెల్యే) ప్రకటించిన విషయం తెలిసిందే. దీంతో నవనీత్ కౌర్ నివాస వద్ద శివసేన కార్యకర్తలు పెద్ద ఎత్తున గుమిగూడి ఆందోళనకు దిగారు. నవనీత్, ఆమె భర్తకు వ్యతిరేకంగా నినాదాలు చేశారు. ఈ నేపథ్యంలో ఉద్ధవ్ ఠాక్రే నివాసం ‘మాతోశ్రీ’ వద్ద హనుమాన్ చాలీసా పఠిస్తామని చేసిన ప్రకటనపై నవనీత్ దంపతులు వెనక్కు తగ్గారు.

మాతోశ్రీ వద్దకు వెళ్లి హనుమాన్ చాలీసా పఠించి తీరుతామన్న ఆలోచనను విరమించుకున్నట్టు తెలిపారు. ఆదివారం ప్రధాని నరేంద్ర మోదీ ముంబయిలో పర్యటించనున్న నేపథ్యంలో శాంతి భద్రతలకు విఘాతం కలగకూడదే ఉద్దేశంతో తమ ఆందోళనను విరమించుకున్నామని తెలిపారు. దీంతో శివసేన కార్యకర్తలు స్వీట్లు పంచుకుని సంబరాలు చేసుకున్నారు. తమ ఆందోళనతో నవనీత్ కౌర్, రవి రాణా దిగొచ్చారని అన్నారు.

అంతకు ముందు నవనీత్ కౌర్ నివాసం వద్ద బారికేడ్లను తోసుకుంటూ శివసేన కార్యకర్తలు చొచ్చుకొచ్చారు. దీనిపై నవనీత్ కౌర్ ఆగ్రహం వ్యక్తం చేశారు. తమ ఇంటి వద్ద దౌర్జన్యం చేయాలంటూ శివసేన కార్యకర్తలను ముఖ్యమంత్రే ఆదేశించారని ఆరోపించారు. బారికేడ్లను సైతం ధ్వంసం చేసి ముందుకు వస్తున్నారని దుయ్యబట్టారు. మాతోశ్రీ వద్దకు వెళ్లి హనుమాన్ చాలీసా పఠించి తీరుతానని, ఈ ముఖ్యమంత్రికి ప్రజలను ఎలా జైల్లోకి నెట్టాలన్నది మాత్రమే తెలుసని విమర్శించారు. తర్వాత కొద్ది సేపటికే ప్లాన్‌ను విరమించుకున్నట్టు ప్రకటించారు.

2019 ఎన్నికల్లో నవనీత్ కౌర్ అమరావతి పార్లమెంట్ స్థానం నుంచి ఇండిపెడెంట్‌గా పోటీచేసి శివసేన అభ్యర్థిపై విజయం సాధించారు. కౌర్ భర్త రవి రాణా సైతం ఎమ్మెల్యేగా గెలుపొందారు. నవనీత్ కౌర్ ప్రకటనతో మాతోశ్రీ నివాసం వద్ద పోలీసులు భద్రతను పెంచారు. ఆ మార్గం గుండా వాహనాలు వెళ్లకుండా బారికేడ్లను అడ్డం పెట్టారు. మరోవైపు, నవనీత్ కౌర్ దంపతులకు పోలీసులు నోటీసులు జారీచేశారు. శాంతి భద్రతలకు విఘాతం కలిగించొద్దని సూచించారు.

మరోవైపు, ఎంపీ నవనీత్ కౌర్ రాణాకు కేంద్రం వీఐపీ భద్రత కల్పించింది. నవనీత్ కౌర్ భద్రతకు ముప్పు ఉందని హోం శాఖకు కేంద్ర నిఘా సంస్థ ప్రత్యేక నివేదిక అందజేసింది. ఈ సిఫారసులకు ఆమోదం తెలిపిన కేంద్ర హోంశాఖ పారామిలిటరీ సాయుధ కమాండోలతో నవనీత్ కు 'వై' కేటగిరీ (సెంట్రల్ కవర్) భద్రత ఏర్పాటు చేయాలని ఆదేశించింది. ఇందులో భాగంగా ముగ్గురు నుంచి నలుగురు సీఐఎస్ఎఫ్ కమాండోలు నవనీత్ భద్రతా విధుల్లో పాల్గొంటారు.