india today latest survey on ap assembly elections 2019

టీడీపీకి షాక్.. జ‌గ‌నే సీఎం తేల్చేసిన జాతీయ స‌ర్వే..!

ఎన్నిక‌లు ద‌గ్గ‌ర ప‌డుతున్నా కొద్దీ స‌ర్వేల హ‌డావుడి ఆస‌క్తిక‌రంగా మారుతోంది. గ‌త నాలుగేళ్లుగా ప్ర‌భుత్వ పాల‌న‌పై, ప్ర‌తిప‌క్షాల ప‌నితీరుపై అనేక సర్వేలు నివేదిక‌లు ఇచ్చిన‌ప్ప‌టికీ, వాటి ఫ‌లితాలు ఎలా ఉన్నా, తాజాగా వ‌స్తున్న స‌ర్వే ఫ‌లితాల‌పైనే ప్ర‌ధాన పార్టీలు ఆశ‌లు పెట్టుకున్నాయి. ఎన్నిక‌లు ఎప్పుడొచ్చినా పోటీకి సిద్దం అంటున్న పార్టీల‌న్నీ, గెలుపుపై ధీమా వ్య‌క్తం చేస్తున్నాయి. ఇక ఆ ధీమాకు తోడు తాజా స‌ర్వేల ఫ‌లితాలు కూడా పాజిటివ్ గా రావ‌డంతో ఇక పార్టీ నేత‌ల్లో ఉత్సాహం ఊపందుకుంటోంది.

అయితే, గ‌తంలోనే ఏపీ రాజ‌కీయాల‌పై స‌ర్వే జ‌రిపిన ఇండియాటుడే సంస్థ‌, ప్ర‌తిప‌క్ష వైసీపీనే రాబోయే ఎన్నిక‌ల్లో అధికారంలోకి వ‌స్తుంద‌ని తేల్చిన సంగ‌తి తెలిసిందే. తాజాగా మ‌రోసారి యాక్సిస్ మై ఇండియాతో క‌లిసి స‌ర్వే నిర్వ‌హించిన ఇండియా టుడే మ‌రోమారు జ‌గ‌నే సీఎం కాబోతున్నాడ‌ని తేల్చి చెప్ప‌డం ఇప్పుడు ఏపీ రాజ‌కీయాల్లో సంచ‌ల‌నంగా మారింది.

చంద్రబాబు ప్రభుత్వ పాలనపై ప్రజల్లో తీవ్ర వ్యతిరేకత వెల్లడవుతున్న నేపధ్యంలో ఏపీలో అధికార మార్పిడి తథ్యమని ఈ సర్వే స్పష్టం చేసింది. సీఎం అభ్యర్థిత్వం విషయానికొస్తే జగన్‌మోహన్‌రెడ్డికి 43% మంది ఓటేశారు. చంద్రబాబుకు 38%, జనసేన నేత పవన్‌ కళ్యాణ్‌కు 5% మాత్ర‌మే మద్దతిచ్చారు ప్ర‌జ‌లు.

ఈ నెల 8 నుంచి 12 వ‌ర‌కు ఐదురోజుల పాటు దాదాపు 10,650 మంది నుంచి సమాచారం సేకరించారు. ఈ సర్వేలో టీడీపీ పాలన పట్ల ప్రజలు తీవ్ర అసంతప్తితో ఉన్నట్టు తేలింది. వచ్చే ఎన్నికల్లో అధికార టీడీపీకి ఎదురుదెబ్బ తప్పదని, కాబోయే సీఎం జగన్‌మోహన్‌రెడ్డి వైపు ఏపీ ప్రజలు మొగ్గు చూపుతున్నట్టు స్పష్టమైంది. ప్రస్తుతం ఎన్నికలు జరగాల్సిన మధ్యప్రదేశ్, రాజస్థాన్, చత్తీస్‌గఢ్, మిజోరాం రాష్ట్రాల‌తో పాటు, మిగ‌తా రాష్ట్రాల్లోనూ ప్ర‌స్తుత ముఖ్య‌మంత్రుల‌కే ఎక్కువ శాతం ప్ర‌జ‌లు సానుకూల‌త చూపితే, ఏపీలో మాత్రం సీఎం చంద్ర‌బాబు క‌న్నా ప్ర‌తిప‌క్ష నేతగా ఉన్న జ‌గ‌న్ కు ఎక్కువ మంది ఓటేసి ఆయ‌నే మా సీఎం కావాల‌ని కోరుకుంటున్న‌ట్లు ప్ర‌జ‌లు వెల్ల‌డించ‌డం విశేషం.

ఈ సర్వేపై శుక్రవారం రాత్రి ఇండియా టుడే ఛానెల్‌లో ‘పొలిటికల్‌ స్టాక్‌ ఎక్స్‌ఛేంజ్‌’ పేరిట నిర్వహించిన కార్యక్రమంలో పలు అంశాలపై ఆసక్తికరమైన చర్చ జరిగింది. ఈ చర్చా కార్యక్రమాన్ని సీనియర్‌ జర్నలిస్టులు రాజ్‌దీప్‌ సర్దేశాయ్, రాహుల్‌ కన్వల్‌ నిర్వహించారు. ఇండియా టుడే సర్వేలో భాగంగా తదుపరి సీఎం ఎవరన్న సూటి ప్రశ్నకు 43% మంది జగన్‌కు అనుకూలంగా ఓటేశారని వారు వెల్లడించారు. 36% చంద్రబాబు ప్రభుత్వ పనితీరుపై బాగాలేదని, 18% ఓ మోస్తరుగా ఉందని స్పష్టం చేశారన్నారు.

ప్రజాసంకల్పయాత్ర పేరిట నిర్వహిస్తున్న పాదయాత్రలో భాగంగా జగన్‌ భారీగా ప్రజలతో మమేకమవుతున్నారన్నారు. జగన్‌ వర్సెస్‌ చంద్రబాబుగా ఎన్నికలు జరగబోతున్నాయన్నారు. ఈ చర్చలో పాల్గొన్న యాక్సిస్‌ మై ఇండియా ప్రతినిధి ప్రదీప్‌ గుప్తా మాట్లాడుతూ 2014 ఎన్నికల్లోనూ వైఎస్సార్‌ కాంగ్రెస్‌కు 44.35% ఓట్లు రాగా టీడీపీకి బీజేపీతో కలుపుకుని 46% ఓట్లు వచ్చాయని గుర్తుచేశారు. బీజేపీ ఎంపీ జీవీఎల్‌ నరసింహారావు మాట్లాడుతూ ఎన్నికలకు వెళ్లనున్న రాష్ట్రాలతో పోల్చితే ఏపీలో ప్రతిపక్షనేత జగన్‌కి మాత్రమే చంద్రబాబు కంటే ఎక్కువ ఓట్లు వచ్చాయన్నారు.

మిగతా రాష్ట్రాల్లో ప్రతిపక్షనాయకుల కంటే సీఎంలకే ఎక్కువ ప్రజాదరణ ఉందని చెప్పారు. పొలిటికల్‌ సైంటిస్ట్‌ సందీప్‌ శాస్త్రి మాట్లాడుతూ టీడీపీ ప్రభుత్వ వ్యతిరేక ఓటు వైఎస్సార్‌ కాంగ్రెస్‌ పార్టీకే పడే అవకాశాలున్నాయన్నారు. ఒకవేళ టీడీపీ–కాంగ్రెస్‌ పొత్తు కుదిరినా, కాంగ్రెస్‌ ఓట్లు టీడీపీకి బదిలీ అవుతాయన్నది అనుమానమేనని, అంతే కాకుండా అక్కడ కాంగ్రెస్‌ బలం నామమాత్రమేనని అభిప్రాయపడ్డారు. ప్రధాని అభ్యర్థిత్వం విషయంలో ఏపీలో కాంగ్రెస్‌ అధ్యక్షుడు రాహుల్‌కు అనుకూలంగా 44%, మోదీకి 33% మద్దతు పలికినట్టు ఈ సర్వే తెలిపింది. అయితే వచ్చే ఎన్నికల్లో ‘ఏపీకి ప్రత్యేకహోదా’ కీలకంగా మారుతుందనే అభిప్రాయం వ్యక్తమైంది.
Tags: india today, latest survey,ap assembly ,elections 2019,ys jagan ysrcp,tdp,naidu