సంపాదన ఆస్థుల్లో ఆంధ్రా నేతలే అగ్ర స్థానం

  • ఏపీలో మొత్తం 19 మంది ఎంపీల ఆదాయం కోట్లలో.
  • అత్యల్ప వ్యక్తిగత ఆదాయం ఉన్నవారిలోనూ ఏపీ ఎంపీనే తొలిస్థానం
  • లోక్‌సభ సభ్యుల వ్యక్తిగత ఆదాయం వివారలపై సర్వే.
  • టాప్‌లో నిలిచిన ఆంధ్రప్రదేశ్ పార్లమెంటు సభ్యులు.
ప్రజా ప్రతినిధుల వ్యక్తిగత ఆదాయం వివరాలపై అసోసియేషన్ ఫర్ డమోక్రటిక్ రిఫామ్స్ నిర్వహించిన పరిశీలనలో ఆసక్తికరమైన అంశాలు వెలుగుచూశాయి. గత ఎన్నికల సమయంలో సమర్పించిన ఆదాయ వివరాల అఫిడ్‌విట్ ఆధారంగా ఈ అధ్యయనం నిర్వహించింది. ఎంపీల వ్యక్తిగత ఆదాయానికి వస్తే జాతీయ సగటు 30.29 లక్షలు కాగా, ఏపీలోని 19 మంది లోక్‌సభ సభ్యుల అదాయం దీనికి మూడు రెట్లు ఎక్కువ. వీరి మొత్తం సగటు ఆదాయం రూ.1.05 కోట్లుగా తేల్చింది. ముఖ్యంగా 16వ లోక్‌సభలోని 521 మంది ఎంపీల ఆదాయం, వృత్తి తదితర అంశాలపై ఏడీఆర్ అధ్యయనం చేసింది. తెలంగాణ ఎంపీలు ఈ జాబితాలో రూ.30.6 లక్షలతో 11వ స్థానంలో నిలిచారు.
అత్యల్ప వ్యక్తిగత ఆదాయం ఉన్నవారిలోనూ ఏపీ ఎంపీనే తొలిస్థానంలో ఉన్నారు. విజయవాడ ఎంపీ కేశినేని నాని తన వ్యక్తిగత ఆదాయ లోటు రూ.2.06 కోట్లుగా తెలిపారు. కాకినాడ తోట నర్సింహం, నాగర్‌కర్నూలు ఎంపీలు తమ వ్యక్తిగత ఆదాయ వివరాలను వెల్లడించలేదు. గత లోక్‌సభలో కేవలం 12 శాతం మంది (58 మంది) మహిళలు మాత్రమే ఉన్నారు. ఎంపీల్లో పురుషుల వ్యక్తిగత ఆదాయ సగటు రూ.30.54 లక్షలు, మహిళలది రూ.28.46 లక్షలు.
ఇక, తెలంగాణ నుంచి ఆదిలాబాద్ టీఆర్ఎస్ ఎంపీ గోడం నగేశ్ రూ.1.52 కోట్లతో అత్యధిక వ్యక్తిగత ఆదాయం లభిస్తున్నవారి జాబితాలో 6వ స్థానంలో నిలిచారు. వీరితోపాటు హజరీబాగ్ ఎంపీ జయంత్ సిన్హా రూ.3.67 కోట్లు (బీజేపీ), సుల్తాన్‌పూర్ ఎంపీ వరుణ్‌గాంధీ రూ.2.78 కోట్లు (బీజేపీ), చండీగఢ్ ఎంపీ కిరణ్ ఖేర్ రూ.1.72 కోట్లతో అత్యధిక వ్యక్తిగత ఆదాయార్జన ఎంపీల జాబితాలో ఉన్నారు. ఈ జాబితాలో రూ.5.2 లక్షలతో గోవా ఎంపీలు చిట్ట చివరన ఉన్నారు.
ఇక, వ్యక్తిగత ఆదాయ పరంగా టాప్ 20 ఎంపీల్లో ఇద్దరు ఏపీ నుంచి ఉన్నారు. వీరిలో గుంటూరు టీడీపీ ఎంపీ గల్లా జయదేవ్ ఆదాయం రూ.16.85 కోట్లుగా వెల్లడించారు. అలాగే వ్యాపారం, వ్యవసాయం తన వృత్తిగా పేర్కొన్నారు. ఆయన తర్వాత వైసీపీ నుంచి ఎన్నికైన నంద్యాల ఎంపీ ఎస్పీవై రెడ్డి రూ.1.86 కోట్లతో ఉన్నారు. అఫిడ్‌విట్‌లో తాను పారిశ్రామికవేత్తగా తెలిపారు.