కరోనాపై రామకృష్ణ మఠం కీలక సూచన

 ప్రపంచాన్ని వణికిస్తోన్న కరోనా వైరస్ మహమ్మారిని ఎదుర్కొడానికి స్వామి వివేకానందుడు ఆయన గురువు శ్రీరామకృష్ణులు వారు జీవితాలే మనకు తగిన వనరులని రామకృష్ణ మఠం పేర్కొంది.

ఈ సంక్షోభాన్ని అధిగమించగలం.. కరోనాపై రామకృష్ణ మఠం కీలక సూచన
ప్రపంచాన్ని కరోనా వైరస్ మహమ్మారి వెంటాడుతుండటంతో కోట్లాది మంది ప్రజలు తీవ్ర భయాందోళనకు గురవుతున్నారు. దేశంలో ఇప్పటి వరకు 341 కేసులు నమోదయినా అధిక జనసాంద్రత దృష్ట్యా మరింత అప్రమత్తంగా ఉండాలి. వైరస్ నియంత్రణకు ప్రభుత్వాలు కూడా పటిష్టమైన చర్యలు తీసుకుంటున్నాయి. ఇలాంటి తరుణంలో ప్రజలు మరిన్ని జాగ్రత్తలు తీసుకోవాలని హైదరాబాద్‌లోని రామకృష్ణ మఠం పేర్కొంది. ఈ మేరకు రామకృష్ణ మఠం, రామకృష్ణ మిషన్ అధ్యక్షుడు స్వామి స్మరణానంద లేఖను విడుదల చేశారు.
‘గత కొద్ది రోజులుగా మానవాళి మొత్తం అత్యంత విషమ పరిస్థితి ఎదుర్కొంటోంది.. ఇలాంటి సమయంలో శ్రీరామకృష్ణ పరమహంస, తల్లి శారదా దేవి, స్వామి వివేకానందుల జీవితాలు, వారి బోధనలు ప్రపంచ ఎదుర్కొంటున్న సంక్షోభం నివారణకు మనకు తగిన వనరులు.. వారి బోధనలు ద్వారా ఖచ్చితంగా ఈ మానసిక-శారీరక, సామాజిక సంక్షోభాన్ని అధిగమిస్తాం. మనకు వీటిపై విశ్వాసం ఉండి, హృదయాల్లో దృఢంగా పాతుకుపోయి ఉంటే,భయపడాల్సిన అవసరం లేదు’. ‘ఆధ్యాత్మిక లక్ష్య సాధనలో మనకు ఎదురయ్యే అవరోధాలు, ఆటంకాలను వ్యక్తిగతంగా, సమిష్టిగా ఎదుర్కొని వారి దయతో ఖచ్చితంగా సంక్షోభాన్ని అధిగమించి లక్ష్యాన్ని సాధిస్తాం. ఆ లక్ష్యాన్ని చేరుకునే వరకు ప్రయాణం ఆగిపోరాదు’ అంటూ మానసిక స్థైర్యాన్ని నింపే ప్రయత్నం చేస్తున్నారు.కాగా, కరోనా వైరస్ గురించి అవగాహన కల్పించడానికి మార్చి 22 నుంచి ఆరు ఆదివారాల పాటు వ్యక్తిత్వ వికాస తరగతులను ఇప్పటికే నిర్వహిస్తోంది. కరోనా వైరస్ వ్యాప్తి నేపథ్యంలో శానిటైజర్లు వినియోగం, పరిశుభ్రత గురించి, పదో తరగతి పరీక్షలు రాసే విద్యార్థులు ఆందోళనను తొలగించడానికి ఈ తరగతులు చేపట్టింది.

Web Title we will all overcome the crisis: ramakrishna math issued directives of coronavirus(Telugu News from Samayam Telugu , TIL Network)

మీ కామెంట్ రాయండి

Leave a Reply