telangana kcr cabinet meeting trs party 2019

క్యాబినెట్ కూర్పుపై ముఖ్యమంత్రి కేసీఆర్‌ కసరత్తు

ప్రభుత్వాధినేతగా కేసీఆర్ ప్రమాణస్వీకారం చేసి వారం రోజుల కావస్తున్నా మంత్రివర్గం ఇంకా ఏర్పాటు కాలేదు. ఈ నేపథ్యంలో క్యాబినెట్ కూర్పుపై ముఖ్యమంత్రి కేసీఆర్‌ కసరత్తు ప్రారంభించారు. ప్రమాణస్వీకారం అనంతరం పాలనపై దృష్టిసారించి సీఎం, తాజాగా మంత్రివర్గ విస్తరణ కార్యాచరణకు పూనుకున్నారు. డిసెంబరు 13న సీఎంగా కేసీఆర్‌, హోం మంత్రిగా మహమూద్‌అలీ బాధ్యతలు చేపట్టారు. దీంతో మంత్రిర్గంలో తొలి విడత 8 మందికి చోటు దక్కనుందని తెలుస్తోంది. డిసెంబరు చివరినాటికి మంత్రివర్గాన్ని విస్తరించాలని సీఎం నిర్ణయించారు. దీనికి మరో 10 రోజుల గడువున్నప్పటికీ మంగళవారం నుంచే ఎంపిక ప్రక్రియను ప్రారంభించి, దాదాపు 8 గంటల పాటు పరిశీలన జరిపినట్టు సమాచారం. ఇందులో భాగంగా టీఆర్‌ఎస్‌లో చేరిన ఇద్దరు స్వతంత్రులతో సహా మొత్తం 90 మంది ఎమ్మెల్యేలు, 30 మంది ఎమ్మెల్సీల జాబితాను తెప్పించి, అధ్యయనం చేపట్టారు.

ఈ దఫా క్యాబినెట్ ఏర్పాటును కేసీఆర్ ప్రతిష్ఠాత్మకంగా తీసుకున్నారు. మంత్రుల ఎంపిక విషయంలో పనితీరు ఆధారంగా ముందుకు సాగుతున్నారు. వ్యక్తులు కాకుండా, పనిమంతులనే నియమించాలని సీఎం భావిస్తున్నారు. అంతేకాదు, వీరిలో ఎవరు తనకు వీర విధేయులో వారినే మంత్రివర్గంలోకి తీసుకోవాలని ఆయన యోచిస్తున్నారు. సామాజిక సమీకరణాలను కూడా పరిగణనలోకి తీసుకుని పదవులు కేటాయించాలని గట్టి నమ్ముతున్నారు. ఎవరెవరికి ఎలాంటి స్థానం కల్పించాలి.. ఉద్యమకారులు, ఎమ్మెల్యేలుగా ఉండి పదవులను వీడి పార్టీలో చేరినవారు, ప్రస్తుత ఎన్నికల్లో వారి మెజారిటీ ఇతర అంశాలను పరిశీలించనున్నారు. అలాగే మహిళలకు ఈసారి క్యాబినెట్‌లో అవకాశం కల్పించనున్నారు. మంత్రివర్గ విస్తరణలో పాతవారికి అవకాశం కల్పించాలని కేసీఆర్‌ భావిస్తున్నారు. గతంలో వారి పనితీరు, ఎన్నికల్లో గెలుపు అంశాలను పరిగణనలోకి తీసున్నట్టు సమాచారం. బుధ, గురువారాల్లోనూ క్యాబినెట్ కూర్పుపై అధ్యయనం చేయనున్నట్లు భోగట్టా. తొలివిడత మంత్రివర్గంలోకి తీసుకునే 8 మందిని ఎంపిక చేసిన తర్వాత వారిని పిలిచి మాట్లాడాలని ముఖ్యమంత్రి యోచిస్తున్నట్లు సమాచారం.
Tags: telangana, kcr cabinet meeting, trs party 2019