dgp mahender reddy gives report on phone tapping to ceo rajat kumar

ఫోన్ ట్యాపింగ్: ముదిరిన వివాదం.. డీజీపీ నివేదిక

ఫోన్ ట్యాపింగ్ అంశంపై సీఈవోకు డీజీపీ నివేదిక ఇచ్చారు. ఏయే సందర్భాల్లో ట్యాప్ చేస్తారో తెలిపారు.

న్నికల వేళ వివాదాస్పదంగా మారిన ఫోన్ ట్యాపింగ్ అంశంపై తెలంగాణ డీజీపీ మహేందర్ రెడ్డి స్పందించారు. తాము ఎవరి ఫోన్లనూ ట్యాపింగ్ చేయడంలేదని స్పష్టం చేశారు. ఈ మేరకు రాష్ట్ర ఎన్నికల ప్రధాన అధికారి (సీఈవో) రజత్ కుమార్‌కు సోమవారం (అక్టోబర్ 29) నివేదిక సమర్పించారు. తాము ఎవరిపై ఎలాంటి వివక్షా చూపడంలేదని, నిరాధారంగా ఆరోపణలు చేస్తున్నారని డీజీపీ అన్నారు. అవసరమైతే జాతీయ భద్రత, రక్షణ ప్రయోజనాల కోసం ఫోన్ ట్యాపింగ్ చేస్తామని, అది కూడా కేంద్ర హోంశాఖ మార్గదర్శకాల అనుగుణంగానే చేస్తామని డీజీపీ వివరించారు. ఎన్నికల సంఘం మార్గదర్శకాలు, ఆదేశాలకు అనుగుణంగానే పోలీసులు పనిచేస్తున్నారని తెలిపారు.

ప్రభుత్వం తమ ఫోన్లను ట్యాప్‌ చేయిస్తోందంటూ ఇటీవల మహాకూటమి నేతలు ఫిర్యాదు చేసిన విషయం తెలిసిందే. టీపీసీసీ అధ్యక్షుడు ఉత్తమ్ కుమార్ రెడ్డి నేతృత్వంలో మహా కూటమికి చెందిన పలువురు నేతలు సీఈవో రజత్ కుమార్‌ను కలిసి ఫిర్యాదు చేశారు. టీఆర్‌ఎస్ ప్రభుత్వం అధికార దుర్వినియోగానికి పాల్పడుతోందని ఆరోపించారు. ఫోన్ ట్యాపింగ్ ఆరోపణలపై మహాకూటమి నేతలు ఇచ్చిన ఫిర్యాదులపై సీఈవో రజత్ కుమార్ చర్యలు చేపట్టారు. ఈ అంశంపై డీజీపీ మహేందర్‌ రెడ్డిని నివేదిక ఇవ్వాల్సిందిగా రెండు రోజుల కిందట కోరారు. ఎవరి ఫోన్లనైనా ట్యాపింగ్‌ చేస్తున్నారా? చేస్తే.. ఎవరెవరివి ట్యాప్‌ చేస్తున్నారు? తదితర వివరాలు ఇవ్వాలని అడిగారు. ఈ నేపథ్యంలో డీజీపీ నివేదిక సమర్పించారు. 
వాహనాల తనిఖీల్లో భాగంగా ప్రతిపక్ష నాయకులను వ్యక్తిగతంగా వేధిస్తూ, కేసుల్లో ఇరికించేందుకు కుట్రలు చేస్తున్నారని, సెల్‌ఫోన్లు ట్యాప్‌ చేస్తున్నారని కాంగ్రెస్ సహా మహాకూటమి నేతలు ఆరోపిస్తున్నారు. ఎన్నికల సంఘం పని తీరుపైనా ఆరోపణలు గుప్పించారు. ఫిర్యాదులు వస్తేనే స్పందించడం కాదని, ఇలాంటి విషయాలపై ముందుగానే చర్యలు తీసుకోవాల్సిన బాధ్యత ఈసీపై ఉందని కాంగ్రెస్ నేతలు వ్యాఖ్యానించారు. మరోవైపు ఫోన్ ట్యాపింగ్ ఆరోపణలను టీఆర్‌ఎస్ నేతలు తీవ్రంగా ఖండించారు. గతంలో కాంగ్రెస్ పార్టీ నేతలు ప్రతిపక్ష నేతల ఫోన్లను ట్యాప్ చేశారు కాబట్టే.. ఇప్పుడు ఆరోపణలు చేస్తున్నారని విమర్శించారు.
Tags: రజత్ కుమార్, ఫోన్ ట్యాపింగ్, డీజీపీ మహేందర్ రెడ్డి, TRS party, TELANGANA ELECTIONS, phone tapping alligation, Phone tapping, DGP Mahender Reddy, ceo rajat kumar