విజయవాడలో భారీ అగ్నిప్రమాదం

  • నగర శివారు ఇబ్రహీంపట్నంలో 12 లారీలు దగ్ధం
  • సుమారు రూ.2కోట్ల ఆస్తినష్టం
 విజయవాడ నగరంలో ఆదివారం జరిగిన అగ్నిప్రమాదంలో 12 లారీలు దగ్ధమయ్యాయి. నగర శివారు ఇబ్రహీంపట్నంలో ఉన్న ట్రక్‌ టెర్మినల్‌ వద్ద ఆదివారం అర్ధరాత్రి నిలిపి ఉంచిన లారీల్లో మంటలు చెలరేగాయి. ఈ ఘటనలో సౌత్ ఇండియా ట్రాన్స్‌పోర్టుకు చెందిన ఆరు లారీలు పూర్తిగా కాలిపోగా.. మరో ఆరు లారీలు పాక్షికంగా దగ్ధమయ్యాయి.
సమాచారం అందుకున్న అగ్నిమాపక సిబ్బంది వెంటనే అక్కడికి చేరుకుని మంటలను అదుపు చేశారు. ఈ ప్రమాదంలో సుమారు రూ.2కోట్ల ఆస్తి నష్టం సంభవించినట్లు తెలుస్తోంది. సంఘటనా స్థలంలో 35 లారీలు ఉన్నాయని, మంటలు మరింత వ్యాపిస్తే నష్టం మరింత భారీగా ఉండేదని అగ్నిమాపక సిబ్బంది చెబుతున్నారు. ప్రమాద సమాచారం తెలుసుకున్న విజయవాడ పోలీసు కమిషనర్ ద్వారకా తిరుమలరావు అక్కడికి చేరుకుని వివరాలు సేకరించారు. దీనిపై ఇబ్రహీంపట్నం పోలీసులు కేసు నమోదు చేసుకుని విచారణ చేపట్టారు. ఈ ప్రమాదంతో లారీల యజమాని శ్యామ్‌ప్రసాద్ షాక్‌కు గురయ్యారు. ఆయన వ్యాపారంలో ఇప్పటికే నష్టాలపాలై ఆర్థికంగా చితికిపోయారని, ఇప్పుడు ఈ ప్రమాదంతో ఆయన పరిస్థితి మరింత దారుణంగా తయారైందని సన్నిహితులు ఆవేదన వ్యక్తం చేస్తున్నారు.