అప్పుడు పూర్తిగా నిరాశలో కూరుకుపోయా..

రాజకీయాలను వదిలేద్దామనుకున్నా..!: కేటీఆర్

2008 ఉప ఎన్నికల్లో టీఆర్ఎస్‌కు ఎదురుదెబ్బ తగిలిన తర్వాత పూర్తిగా నిరాశలో కూరుకుపోయామని టీఆర్ఎస్ నేత, మంత్రి కేటీఆర్ తెలిపారు. ఆ దశలో కాంగ్రెస్ పార్టీలో విలీనం కాకతప్పదని అనిపించిందని, అదే జరిగితే రాజకీయాల నుంచి తప్పుకోవాలని భావించానని గుర్తు చేసుకున్నారు. ప్రేమ్‌రాజ్ దర్శకత్వంలో తెరకెక్కిన ‘శరణం గచ్ఛామి’ చిత్రం ఆడియోను ఆదివారం హైదరాబాద్‌లో కేటీఆర్ విడుదల చేశారు. ఈ సందర్భంగా ఆయన మాట్లాడుతూ పై వ్యాఖ్యలు చేశారు.

సినిమా ఓ వ్యాపారమని, తొలి రోజే డబ్బులన్నీ వచ్చేయాలన్న లెక్కలున్న ఈ రోజుల్లో ఇటువంటి కథను ఎంచుకోవడం సాహసమే అవుతుందన్నారు. ఉప ఎన్నికల తర్వాత నిరాశలో కూరుకుపోయిన తనకు ఓ పత్రికలో ప్రేమ్‌రాజ్ రాసిన వ్యాసం చదివాక కొత్త ఉత్సాహం వచ్చిందన్నారు. తర్వాత అతడిని కలుసుకుని మాట్లాడానని గుర్తు చేసుకున్నారు. ప్రేమ్‌రాజ్ తీసింది మూడు సినిమాలే అయినా రాశి కంటే వాసి ముఖ్యమని చాటారని పేర్కొన్నారు. ఈ చిత్రానికి ఎటువంటి సాయం కావాలన్నా అందించేందుకు ప్రభుత్వం సిద్ధంగా ఉందన్నారు. దర్శకుడు ప్రేమ్‌రాజ్ మాట్లాడుతూ బీఎండబ్ల్యూ కంటే ఇంట్లో బియ్యం ఉంటే చాలనుకునే వ్యక్తిని తానని అన్నారు. ఇదివరకు తీసిన రెండు చిత్రాలు కూడా సమాజం కోసమేనని తెలిపారు.